O Centro Superior de Hostelería de Galicia está entre os cinco finalistas do concurso da cadea hoteleira Accor cuxa final se celebra en xuño na capital francesa

As alumnas Paula Casares, María Olalla Gómez e Regina Porto participan no certame coa súa proposta ‘Planet 21’ diante de directivos da cadea francesa e optan ao galardón para implantar o seu proxecto medioambiental nos establecementos da cadea. Deberán explicar o procedemento a instaurar dende a chegada do cliente ata a súa marcha, tanto para establecementos de negocio como vacacionais.

O número de afiliacións á Seguridade Social en actividades relacionadas co turismo en abril foi 68.487, 926 máis que no mes anterior

Por ramas de actividade a que amosa un maior peso é a de servizos de comidas e bebidas, con 58,476 persoas, e que representa un 85,38% do total de afiliacións nas actividades do sector. A variación do número de afiliacións supón, respecto ao mes anterior, unha suba do 1,37%, concretamente o 1,82% para o réxime xeral e o 0,60% no caso do réxime de autónomos.

O Xacobeo inicia a xira por terras insulares de Portugal da exposición fotográfica ‘Olladas no camiño de Santiago’

Esta exposición, que comezou a súa itinerancia por Portugal o pasado 29 de abril en Barcelos, amósase simultaneamente con dúas coleccións tanto por terras continentais como insulares do país veciño. A mostra Olladas no Camiño pode visitarse no Centro de Estudos Natalia Correia, na localidade de Ponta Delgada da Illa de San Miguel, nas Azores, e permanecerá alí ata o día 27 de maio. Na exposición reflíctese a visión particular sobre o Camiño de Santiago dos fotógrafos galegos Delmi Álvarez, Fernando Bellas, Tino Martínez, Javier Teniente, Xulio Villarino e Tino Viz.

A Xunta de Galicia acondiciona a contorna do Cruceiro da Santísima Trinidade de Baiona para a súa posta en valor turística

As obras foron sufragadas pola Secretaría Xeral para o Turismo e incluíron instalación de saneamento e electricidade con canalización subterránea e diferentes acabados en pavimentación. Baiona é un dos destinos galegos integrados no Proxecto SICTED cuxo obxectivo fundamental é acadar un nivel de calidade homoxéneo nos servizos ofrecidos ao turista. Hai cinco destinos SICTED en Galicia, que é a terceira comunidade española con maior número de empresas distinguidas.

A xerente de Turgalicia e a delegada territorial presentaron en Lugo a Xornada de Portas Abertas das Rutas dos Viños de Galicia

O sábado día 26 de maio, 72 adegas das cinco Denominacións de Orixe Protexida ofrecen unha visita guiada polas súas instalacións e unha degustación gratuíta Un total de 31 restaurantes ofrecerán 62 menús enogastronómicos a 25 euros para adultos e menú especial para nenos de ata 12 anos a 10 euros Na provincia de Lugo, 6 adegas e 6 restaurantes participan nesta iniciativa coa que se pretende impulsar o valor do enoturismo e ampliar as posibilidades turísticas da comunidade A iniciativa constitúe a primeira acción do Plan de Turismo Enogastronómico da Xunta de Galicia, que foi aprobado o 3 de maio polo Consello da Xunta. Ademais, de degustacións e visitas, as xornadas inclúen actividades complementarias.

Abre en Santiago un ‘Welcome Service’ para peregrinos posto en marcha este mes e xestionado polas asociacións inglesa e irlandesa de amigos do camiño

A secretaria xeral para o Turismo recibiu hoxe aos promotores do servizo de información en inglés para peregrinos que ven de pórse en marcha este mes na Oficina do Peregrino de Santiago. A inauguración oficial tivo lugar hoxe, cunha misa do peregrino oficiada por un bispo inglés. O Welcome Service é unha iniciativa das asocacións inglesa –Confraternity of Saint James- e irlandesa –Irish Society of friends of St. James-e estará atendido por voluntarios de ambas asociacións. Só no que vai do mes de maio máis de nove mil peregrinos recolleron a ‘Compostela’ nas dependencias da Oficina do Peregrino compostelana. No que vai de ano, as compostelas entregadas achéganse ás trinta mil.

Xornalistas letonas visitan Compostela para escribir sobre o Camiño de Santiago nos medios do grupo Subbota, o máis importante de Lituania que edita en lingua rusa

Estiveron en Santiago ata hoxe e o obxectivo da súa viaxe é informar sobre os aspectos culturais vinculados ao Camiño de Santiago. Pertencen a distintos medios do importante grupo editorial letón en lingua rusa Subbota. A viaxe está organizada pola S.A. de Xestión do Plan Xacobeo e a Oficina Española de Turismo en Estocolmo.